A turkology blog

Archive for فېۋرال, 2009

ئۇيغۇر ئاشپۇزۇلى ماكدونالدنىڭ ماركا ھوقۇقىغا دەخل تەرۇز قىلدى


مەدىنە تېز تاماقخانىسى نامىدىكى ئۇيغۇر ئاشپۇزۇلى ئامېرىكىنىڭ دۇنياغا داڭلىق تاماقخانىسى ماكدونالد (McDonald’s) نىڭ ماركىسىنى تەقلىد قىلىپ ياسىۋالغان. گەرچە مەدىنە دىگەن سۆزنىڭ باش ھەرىپى بىلەن ماكدونالد دىگەن سۆزنىڭ باش ھەرىپى ئوخشاش بولسىمۇ ئۇلار بۇ M نى ماكدونالنىڭ ماركىسىغا ئوپمۇ-ئوخشاش قىلىپ لايھەلەپ، McDonald’s ماركا ھوقۇقىغا دەخىل قىلغان.

سۈرەتنى ۋىنسانت مالىك تەمىنلىگەن


ھەقسىز خەلقئارالىق تور تېلفونى (چۈشۈرۈش ھاجەتسىز)

ھەقسىز، توردىلا ئۇرغىلى بولىدىغان، پۈتۈن دۇنيادا ئىشلەيدىغان ھەقسىز تور تېلفونى. يىتەرسىزلىكى كۆپۈنچە سەكرەپ ئېلان چىقىۋالىدىكەن. ئاۋاز سۈپىتى ھەم ياخشى ئەمەس. ئەمما ھىچقانداق دېتال چۈشۈرمەيلا ھەقسىز تېلفون ئۇرغىلى بولىدىكەن. تېلفون قوبۇل قىلغىلىمۇ بولىدىكەن. ھەقسىز تېلفون ئۇرىدىغان ۋاقتقا چەك قويمايدىكەن. ئەمما ئاۋال تىزىملىتىشىڭىز ۋە تىزىملاتقان email گە كەلگەن خەتنى تەستىقلىشىڭىز كېرەك.
ئادرېسى:
freeringer.biz

Google Sync ئارقىلىق يانفوندىكى تېلفون دەپتىرىنى ساقلاش.

يانفوننى فورماتلاش، يانفون يۈتۈپ كېتىش، كارتا ئالمىشىش ۋە ھەرقانداق سەۋەب بىلەن ئالاقىلاشقۇچىلارنىڭ تېلفون نومۇرى قاتارلىق ئۇچۇرلار يوقاپ كېتىدىغان ئەھۋال ھەممەيلەننى ئوسال قىلىدۇ. گۇگول شىركىتى بۇنى نەزەردە تۇتۇپ، Google sync نامىدىكى ئېسىل بىر مۇلازىمەتنى يولغا قويغان. بۇ مۇلازىمەت ھازىرچە پەقەت، گۇگول يانفونى، ئايفون، symbian ۋە قارا بۆلجۈرگەن (بلاكبەرى) سېستىملىق يانفونلارنىلا قوللايدۇ. ئايفون ئىشلىتىدىغان ئۇيغۇرلار ئانچە كۆپ بولمىسا كېرەك، ئەمما سىمبىيان ئىشلىتىدىغانلار كۆپ. سىمبىيان سېستىملىق يانفونلارنىڭ ئۇلىنىش تىزىملىكىدە sync دەيدىغان بىر كۆزنەك بار. شۇ كۆزنەكتىن تەڭشەش ئارقىلىق گۇگول sync نى ئىشلىتەلەيسىز.
بۇنى ئىشلەتكەننىڭ نىمىگە پايدىسى بار؟
تېلفون دەپتىرىڭىزدىكى ئالاقە ئۇچۇرلىرىنى ھەر ۋاقت گۇگول مۇلازىمىتېرىدا ساقلايسىز، يېڭى قوشۇلغان نومۇرلار ۋە ئۆچۈرۈلگەن نومۇرلارنى ئاپتوماتىك يېڭىلايسىز، بۇ ئارقىلىق گۇگول بۇ مۇلازىمەتنى يوقاتمىسىلا تېلفون دەپتىرى يوقاپ كەتمەيدۇ.
تەڭشەش ۋە باشقا ئۇچۇرلارغا بۇ يەردىن ئېرىشىڭ.
baliq.blogspot.com/googlesync

جۇڭگو يۇمشاق دېتاللىرىنىڭ چەتئەل سىياسىتى

يېقىندىن بۇيان نۇرغۇن ئىشلارغا ھەيران قېلىۋاتىمەن. بىر دانە QQ نومۇرى ئېلىشقا قانچىلىك ۋاقت كېتىدۇ. سىز ئاۋال im.qq.com غا كىرىش ئۈچۈنمۇ كىيۇكىيۇنىڭ مەشغۇلات يۈزىدىن ئىككى كونۇپكا چېكىسىز، تىزىملىتىش جەريانى مۇرەككەپ ھەم ئۇزۇن، ئۇششاق-چۈششەك سۇئاللار ۋە خەنزۇچە قاتتىق پىششىق بولمىسا قىلغىلى بولمايدىغان جەريان. ھالبۇكى خەنزۇ تىلى بىلمەي ئېنگلىز تىلى بىلسىڭىز كيۇكيۇ نومۇرى ئېلىشقا ئاران 5 سېكونتلا ۋاقت كېتىدۇ. تېخى سېستىما ئالدىراش كېيىنرەك ئىلتىماس قىلىڭ دىگەن گەپمۇ يوق… ئىشەنمىسىڭىز signup.qq.com غا كىرىپ ئىلتىماس قىلىپ بېقىڭ. بارلىق تاللاشلارنى 5 سېكونتتىلا تاماملايسىز. ۋە تېزلا بىر كيۇكيۇ نومۇرىغا ئىلتىماس قىلالايسىز……
جۇڭگوچە نۇسخىدىكى كيۇكىيۇداچۇ؟ … 5 سېكونت مۇمكىن ئەمەس! تېخى كيۇكيۇنىڭ ئېنگلىزچە نۇسخىسى ئىنتايىن كىچىك، سەكرەپ چىقىدىغان ئېلان يوق، ئۇششاق-چۈششەك گەپلەر ئاز. ئات مىنگەندەك راھەت. خەنزۇچە نۇسخىدىكى كيۇكىيۇدا ھە دىسە سەكرەپ چىقىدىغان ئېلانلار… ھە دىسە ئۆزلىكىدىن ئېچىلىپ كېتىدىغان ئۇچۇر. يەنە بىر مۇنچە سۆرەلمە گەپ… قاششاڭ ئىشەك مىنگەندەك كىشىنى بىئارام قىلىدۇ.
يانفوندا تورغا چىقىپ UCWEB نى ئىشلىتەتتىم.
بۇنىڭ قاملاشمىغان ئارتۇقچە كۆزنەكلىرى مېنى بەكمۇ بىزار قىلاتتى. تۆنۈگۈن ئېنگلىزچە نۇسخىسىنى قاچىلاپ كۆرسەم ئېلاننىڭ بىرسىمۇ يوق. تورغا چىقىپ سىن كۆرۈش، ئارتۇقچە ئىچىدە ھىچنىمە يوق يول باشلاش بەتلىرى ۋە ئۇششاق-چۈششەك پالانى ئالامەت….. لەرنىڭ ھىچقايسى يوق. شۇنداق ئاددى، ھەم قولاي…
غەلىتە ئىش. جۇڭگولۇق پروگراممېرلار يۇمشاق دېتال ئىشلىسە جۇڭگولۇقلارغا قىيىن، چەتئەللىكلەرگە ئاسان قىلىپ ئىشلەيدىكەن. بۇ نىمە ئىشتۇ؟!….

داڭلىق بلوگنى قانداق يېزىپ چىقىمىز؟

بلوگنى سىز مەيلى نىمە مەقسەتتە يېزىڭ، ئۇنىڭ بىر ياخشى ئۇسۇلى بار. ئەگەر سىز يازغۇچى، شائىر، تەتقىقاتچى-ئالىم، سودىگەر ۋە مەخسۇس بىر كەسپ ئىگىسى بولسىڭىز ئۆز كەسپىڭىزدىكى تەجىربىلىرىڭىزنى يازسىڭىز بولىدۇ. سىز بىلەن ئوخشاش كەسپتىكىلەر ۋە يېڭى ئۆگەنگۈچىلەر سىزنىڭ مەڭگۈلۈك ئوقۇرمەنلىرىڭىزگە ئايلىنىدۇ. ئەگەر سىز يۇقارقىلار بولمىسا مۇنداق يازىسىز.
1. بلوگ مەزمۇنىنى تاللايسىز.
بلوگ ھەرگىز ئۇنۋېرسال بولمىسۇن. چۈنكى ئۇنۋېرسال-ھەممەباب تور بەتلەر بەك كۆپ. ھەقسىز مۇلازىمىتېردە قۇرغان كىچىك بىر بلوگ يەرشارىدىكى ھەممە مەزمۇننى ئۆز ئىچىگە ئالسا كۆرۈنەرلىك يازمىلار چىقمايدۇ. ھەم كىشىلەر قىزىزقمايدۇ. قىسقىسى ياراشمايدۇ.
ئۇنداقتا نىمە مەزمۇندا يېزىش كېرەك؟
نۇرغۇن دوستلار بۇنى ئويلاشقاندا ئۇيغۇرلاردا ھازىر مانداق تور بەت يوقكەن، مۇشۇ مەزمۇندا قۇرسام بولغۇدەك دەپ ئويلايدىكەن. مەنچە بۇ كۆز – قاراش خاتا. سىز چوقۇم بۇ بوشلۇقنى تولدۇرالىشىڭىز ناتايىن.
بلوگ مەزمۇنى- چوقۇم چوقۇم چوقۇم سىز ئەڭ قىزىقىدىغان تېمىلار ئۈستىدە بولىشى كېرەك. سىز پەقەت ئۆزىڭىز ئەڭ قىززىققان ئىشنىلا ئەڭ مۇكەممەل ۋە باشقىلاردىن ئاشۇرۇپ قىلالايسىز.
مەسلەن سىز بېلىق تۇتۇشقا قىززىقىسىز. ئۇنداقتا ھىچ ۋاقەسى يوق. دەرھاللا دۇنيادىكى بېلىقنىڭ تۈرلىرى ۋە بېلىق تۇتۇش ھەققىدە يېزىڭ. بېلىق تۇتىۋاتقان كۆرۈنۈشلەرنى رەسىمگە ئېلىپ يوللاپ تۇرۇڭ…. دىگەندەك.
بۇنداق بولغاندا مەزمۇن دائىرسى بەك چەكلىك بولۇپ قالامدۇ؟
بۇ سۇئالنىڭ جاۋابىغا يازما داۋامىغا دىققەت قىلىڭ.
2. مەنبەلەرنى تولۇقلاش
چوقۇم Google Reader گە ئوخشاش ئېلخەت ئارقىلىق تور بەتلەردىن يېڭى مەزمۇن ۋە يېڭىلانغان مەزمۇننى ئاپتوماتىك قوبۇل قىلىدىغان ئوقۇغۇچ ئىشلىتىڭ. ئادرېسى reader.google.com
بۇ ئوقۇغۇچقا ئۆزىڭىزنىڭ بلوگ مەزمۇنىغا مەزمۇنداش بولغان داڭلىق باشقا بلوگلارنى ۋە باشقا تىلىدىكى بلوگلارنى قوشۇڭ. ئۇلارنىڭ ئۇتۇق قازانغان يازمىلىرىدىن ئۆرنەك ئېلىڭ. مۇۋاپىقلىرىنى تەرجىمە قىلىڭ. مۇۋاپىقلىرىنى ئۆزلەشتۈرۈڭ. 10 يېڭى مەزمۇن قوبۇل قىلسىڭىز ھەممىنى بىراقلا تەرجىمە قىلىپ يوللاۋەرمەڭ. شۇلارنىڭ ئىچىدە سىزنى ئەڭ تەسىرلەندۈرگەن ياكى سىزگە ئەڭ ياققاننى ئۆزلەشتۈرۈڭ. بۇنداق قىلغاندا مەنبەسىنى چوقۇم ئەسكەرتىڭ.

Dell ماركىلىق يانفون چىقىدۇ.

دەل شىركىتى ئۆزىنىڭ ماركىسىدىكى ئەقلى ئىقتىدارلىق يانفون چىقارماقچى. ئەقلى ئىقتىدارلىق يانفونلارنىڭ كۈنسايىن خاتېرە كومپيوتېرغا يېقىنلىشىشى، كومپيوتېردا قىلىدىغان ئىشلارنى يانفوندا قىلغىلى بولۇشى، نۇرغۇن كىشىلەرگە قولايلىق كەلتۈرگەندىن باشقا، لەپتوپ شىركەتلىرىگە ئېغىر بىر سىناقنى ئېلىپ كەلدى. بۇنىڭ نەتىجىسىدە ئالما شىركىتى، لەنوۋو شىركىتى قاتارلىق داڭدار كارخانىلار ئۆزىنىڭ ماركىسىدا ئەقلى ئىقتىدارلىق يانفونلارنى چىقاردى. iPhone نىڭ دۇنيا مىقياسىدا بازار تېپىشى، گۇگول شىركىتىنىڭ T-mobile بىلەن ھەمكارلىشىپ بازارغا سالغان يانفونى قاتارلىقلار بۇ خىرىسنى تېخىمۇ كەسكىنلەشتۈردى.
يانكومپيوتېرچىلىقتىكى داڭدار ماركا دەل (Dell) مۇ بۇنى تونۇپ يەتكەن بولسا كېرەك. ئۇلار ئۆتكەن ھەپتە نيويورك ۋاقتى گېزىتىگە بەرگەن ئۇچۇرىدا يېقىندا دەل ماركىلىق ئەقلى ئىقتىدارلىق يانفوننى تەتقىق قىلىۋاتقانلىقىنى ئاشكارىلىدى.

ئىران ئۆزى ياسىغان سۈنئى ھەمرانى ئوڭۇشلۇق قويۇپ بەردى

شىنخۇا تورىنىڭ خەۋرىدە ئېيتىلىشىچە ئىران تۇنجى قېتىم ئۆزى تەتقىق قىلىپ ياسىغان پەن-تەتقىقات تەكشۈرۈشىگە ئىشلىتىدىغان ئۈمد ناملىق سۈنئى ھەمرانى مۇۋەپپەقىيەتلىك ھالدا 2009-يىلى 2-ئاينىڭ 3-كۈنى قويۇپ بەردى. ئەلچى ناملىق راكىتا سۈنئى ھەمرانى مۇۋەپپەقىيەتلىك ھالدا ئوربىتىغا يەتكۈزگەن. شىنخۇا تورىدىكى مۇناسىۋەتلىك خەۋەر.
ئىران ئاجايىپ دۆلەتكەن. ئۇنىڭ خەلقئارادا ئامېرىكىغا ياق! دىيەلەيدىغان دۆلەت دەپ نامى بار. Windows Vista نى تۇنجى بولۇپ ئىرانلىق پروگراممېرلار (بۇ يەردە خاككېرلار) يېشىۋەتتى. قارىغاندا ئىراننىڭ پەن-تېخنىكا كۈچى خېلى زوردەك تۇرىدۇ.
بۇندىن ئىگلىرى ئىران ھەققىدە بىزنىڭ بىلىدىغىنىمىز جالالىدىن رۇمى، شەيخ سەئىدى قاتارلىق ئەدبلەر ھەققىدە بولسا كېرەك. گۈلستان…. دىگەندەك ئەسەرلەر ئىران ئەدەبىياتىنىڭ مۇنەۋۋەر مەھسۇلاتى.

ئامېرىكا ئىقتىسادىنىڭ ئۇيغۇر دېھقانلىرىغا بولغان چوڭ تەسىرى

سىز ئويلاپ باققانمۇ؟ بالىق دەرۋازىسىغا ئوت كەتسە، كۆلدىكى بېلىقلارغا بالا تېگىپتۇ دىگەندەك. ئامېرىكىدا ئىقتىسادى كىرزىس يۈز بەرسە ئۇيغۇر دېھقانلىرىنىڭ بىر يىللىق ئەمگىكى پۇلغا ئەرزىمەس بولىدۇ.ئامېرىكىدا ئىقتىسادىي كىرزىس يۈز بەرسە چوڭ كارخانىلارنىڭ ئىشى، دېھقان ئۇيغۇرلار بىلەن ئالاقىسى يوق دەپ ئويلىشىڭىز مۇمكىن. ئۆتكەن يىل يۈز بەرگەن ئامېرىكا پۇل مۇئامىلە كىرزىسى ئۇيغۇر دېھقانلىرىنى چوڭ ئىقتىسادى زىيانغا ئۇچراتتى. تەپسىلاتى: ئاۋال تۆۋەندىكى تەپسلاتلارغا قارايلى:
1. ماتېرىيال: پاختا ئىشلەپچىقارغۇچىلار
جۇڭگو دۇنيادىكى ئەڭ چوڭ پاختا ئىشلەپچىقارغۇچى دۆلەت (خەلق گېزىتى)
شىنجاڭ جۇڭگونىڭ ئەڭ چوڭ پاختا بازىسى (خەلق گېزىتى)
ئۇيغۇرلار شىنجاڭدىكى ئەڭ كۆپ پاختا ئىشلەپچىقارغۇچى (تەكلىماكان بلوگ)
جۇڭگودىن باشقا يەنە ئاۋستىرالىيە، زېمبابۋى، ئامېرىكا، ئۇزبەكىستان قاتارلىقلاردىمۇ كۆپ مىقداردا كېۋەز تېرىلىدۇ. باشقا پاختا ئىشلەپچىقارغۇچىلارنىڭ دۇنيادىكى ئىشلەپچىقىرىش مىقدارىنى رەتكە تىزغاندا مۇنداق بولىدۇ:
جۇڭگو
ئامېرىكا قوشما شىتاتلىرى
ھىندىستان
پاكىستان
برازىلىيە
تۈركىيە
گرىتسىيە
ئاۋسترالىيە
سۈرىيە
مالى
2. ماتېرىيال: پاختا ئېكسپورت قىلغۇچىلار (چەتئەلگە ساتقۇچىلار)
ئامېرىكا (چەتئەلگە پاختا ساتىدىغان ئەڭ چوڭ دۆلەت)
ئاۋسترالىيە
ئۆزبەكستان
برازىلىيە
گرىتسىيە
مالى
مىسىر
بۇركىنا فاسو
زىمبابۋى
تاجىكىستان
يۇقارقى دۆلەتلەر دۇنيادىكى ئەڭ كۆپ پاختا ساتىدىغان دۆلەتلەردۇر. بۇلارنىڭ ئىچىدە ئامېرىكىنىڭ چەتئەلگە ساتىدىغان پاختىسى پۈتۈن دۇنيا پاختىسىنىڭ يېرىمىنى ئىگىلەيدۇ.
3. ماتېرىيال: پاختا ئىمپورت قىلغۇچىلار (چەتئەلدىن سېتىۋالغۇچىلار)
جۇڭگو (دۇنيادىكى ئەڭ كۆپ پاختا سېتىۋالغۇچى)
تۈركىيە
ھىندونېزىيە
مېكسىكا
تايلاند
پاكستان
رۇسىيە
جەنۇبى كورىيە
ئىتالىيە
ھىندىستان.
جۇڭگو پۈتۈن دۇنيا پاختىچىلىقىدىكى ئەڭ كۆپ پاختا ئىمپورت قىلغۇچى. پۈتۈن دۇنيادا سېتىلغان پاختىنىڭ يېرىمىنى دىگۈدەك جۇڭگو سېتىۋالىدۇ.
ماتېرىياللار خەلق گېزىتى ۋە مۇناسىۋەتلىك ئىقتىسادى ئاخباراتلاردىن توپلاندى.
يۇقارقى ماتېرىيالدىن كۆرۈشكە بولىدۇكى جۇڭگو دۇنيا بويىچە ئەڭ كۆپ پاختا ئىشلەپچىقارغۇچى ۋە ئەڭ كۆپ پاختا سېتىۋالغۇچى. دىمەك جۇڭگو ئۆزى ئىشلەپچىقارغان پاختىلار ئېھتىياجنى قامدىيالمايدۇ. شۇڭلاشقا كۆپۈنچە پاختىنى ئامېرىكىدىن سېتىۋالىدۇ.
ئۇنداقتا جۇڭگو بۇنچە كۆپ پاختىنى نىمە قىلىدۇ؟
جۇڭگو دۇنيادىكى ئەڭ كۆپ رەخت ۋە پاختا توقۇلما بويۇملىرى ئېكسپورت قىلغۇچى. پۈتۈن دۇنيادىكى بولۇپمۇ شىمالى ئامېرىكا ۋە ياۋروپادىكى كىيىم-كېچەك كارخانىلىرىنىڭ كۆپۈنچىسى جۇڭگونىڭ پاختا رەختلىرىنى سېتىۋالىدۇ. بۇ رەخت زاۋۇتلىرى شەرقتىكى سۇجوۋ قاتارلىق شەھەرلەرگە جايلاشقان.
ئۇيغۇرنىڭ 90 پېرسەنتتىن ئارتۇقى دېھقان. ھەم بۇ دېھقانلارنىڭ جەنۇبتىكى بارلىق دېھقانلارنىڭ ئاساسلىق ئىقتىسادى كىرىمى پاختىدىن كىرىدۇ. 2007-يىلى پاختا باھاسى تەخمىنەن چىگىتلىك پاختا ھەر كىلوگرامى 6 يۈەندىن يۇقىرى بولغان. بۇ باھا دېھقانلارنىڭ سېتىش باھاسى. كارخانىلارنىڭ باھاسى ئەمەس.
بىر مو يەردىن كۆپ بولغاندا 300 كىلوگرامدىن ئارتۇقراق پاختا ئالغىلى بولىدۇ. شۇ بويىچە بولغاندا ھەر مو يەردىن 2007-يىلى 1800 يۈەنلىك پاختا سېتىلىدۇ. ئۇيغۇر دېھقان مايسىنى پاختا قىلىش ئۈچۈن يەرنى ئاغدۇرۇش، ئوغۇتلاش، سۇغۇرۇش، ئوتاش-پۇتاش ۋە باشقا بارلىق چىقىملار بىلەن 800 يۈەندىن كۆپرەك چىقىم قىلىدۇ. شۇنداق بولغاندا بىر مو يەردىن 1000 يۈەن پايدا چىقتى دىگەن گەپ.
2008- يىللىق پاختا تېرىش مەزگىلىدە يەرگە ئىشلىتىدىغان دېھقانچىلىق ماددىي ئەشيالىرىنىڭ باھاسى شىددەت بىلەن ئۆرلەپ كەتتى. مەسلەن ئامېرىكىدىن ئىمپورت قىلىنىدىغان ئاممونىي فوسفات ئوغۇتىنىڭ بىر قېپى نورمال باھاسى 150 يۈەن ئىدى. 2008-يىلى ئەتىيازدا 280 يۈەنگە ئۆرلىگەن. شۇ بويىچە بولغاندا 2008- يىلى دېھقانلار بىر مو يەرگە سالغان مەبلەغ 800 يۈەندىن ئېشىپ كەتتى دىگەن گەپ.
ئەمما پاختىنىڭ 2008-يىلدىكى سېتىۋېلنىش باھاسى 3 يۈەن بىلەن 4 يۈەننىڭ ئارلىقىدا بولدى. بىر مو يەردىن 1000 يۈەنلىك پاختا سېتىش چوڭ نىشان بولۇپ قالدى. 1000 يۈەن مەبلەغ سېلىپ، 1000 يۈەن تاپسا كىرىم يوق دىگەن گەپ.
2008-يىلى پاختا تېرىغان دېھقانلارنىڭ كۆپۈنچىسى كۆزلىگەن نىشانغا يېتەلمىدى. چۈنكى پاختا باھاسى شىددەت بىلەن چۈشۈپ كەتتى. ماددى ئەشيا قىممەت ، مەھسۇلات باھاسى ئەرزان بۇنداق ئەھۋالغا كىم سەۋەبچى بولدى؟
تەكلىماكان بلوگ شۇنداق قارايدۇكى
ئامېرىكا !
ئامېرىكا سەۋەبچى بولدى.
ئامېرىكىدا ئىقتىسادى كىرزىس كۆرۈلۈپ، نۇرغۇن كارخانىلار تاقالدى. بۇنىڭ بىلەن سۇجۇ قاتارلىق شەھەرلەردىكى رەختچىلىك ۋە توقۇمچىلىق كارخانىلىرىنىڭ ماللىرى بېسىلىپ قالدى. ئۇلارنىڭ ماللىرى ئامېرىكا قاتارلىق دۆلەتلەرگە كۆپ مىقداردا سېتىلمىدى. شۇنداق قىلىپ سۇجۇۋدىكى كارخانىلارنىڭ 85 پېرسەنتى تاقىلىپ قالدى.
بۇ تاقىلىپ قېلىش پاختىغا بولغان ئېھتىياجنى زور دەرىجىدە تۆۋەنلەتتى. شۇنىڭ بىلەن پاختا باھاسى شىددەت بىلەن تۆۋەنلىدى. نورمال باھاسى 6 يۈەنلىك پاختىنىڭ بىردىنلا 3 يۈەنگە چۈشۈپ قېلىشى دېھقانلارغا زىيان كەلتۈردى.
ئامېرىكا ئىقتىسادى كىرزىسى پۈتۈن دۇنيا ئىقتىسادىغا بەلگىلىك تەسىر كۆرسەتتى. ياۋروپادىكى كارخانىلارمۇ شۇنىڭ ئىچىدە. نۇرغۇن كارخانىلار تاقالدى. ماللار بېسىلىپ قالدى، تىجارەت كۆلۈمىنى كىچىكلەتتى، ياكى باشقا ساھەلەرگە يۈرۈش قىلدى. پۈتۈن دۇنيا رەخت ۋە پاختا توقۇمچىلىق بويۇملىرىنىڭ تەمىنلىگۈچىسى بولغان جۇڭگو كارخانىلىرى چەتئەللىك چوڭ سوممىلىق توختاملارغا ئېرىشەلمىدى. شۇنىڭ بىلەن ئۇلار پاختىنى ئالماي قويدى.
ئاخىرقى ھىسابتا جۇڭگونىڭ ئەڭ چوڭ پاختا بازىسى بولغان شىنجاڭدىكى پاختا ئىشلەپچىقارغۇچى دېھقانلارنىڭ مەنپەئەتى بۇنىڭ تەسىرىگە ئۇچرىدى.
ئەلۋەتتە تېمىنىڭ ماۋزۇسى ئۇيغۇر دېھقانلار ۋە ئامېرىكا ئىقتىسادى كىرزىسى ئۈستىدە بولغاچقا بىز باشقا تەرەپلەرنى سۆزلىمىدۇق. شەرقى شىمال ۋە جۇڭگونىڭ باشقا ئۆلكىلىرىدىكى پاختا ئىشلەپچىقارغۇچىلارمۇ بۇنىڭ سىرتىدا ئەمەس.
ئۇنداقتا 2009-يىلى پاختا باھاسىدا قانداق ئەھۋال يۈز بېرىدۇ.
دۇنيا ئىقتىسادىي كىرزىسى داۋاملىشىۋاتقان پەيتتە 2009- يىلى پاختا تېرىغانلار يەنىلا ئوخشاش ئاقىۋەتكە دۇچار بولامدۇ؟ بىز بۇ ھەقتە ماتېرىياللارنى تەھلىل قىلىپ كېيىنكى يازمىدا توختىلىمىز.
ھۆرمەت بىلەن – تەكلىماكان بلوگ.

Blogbus دىن BlogSpot قا كۆچۈش ئۇسۇلى

Blogbus دىن Blogspot ياكى Blogger غا بىۋاستە كۆچكىلى بولمايدۇ. ئەمما Blogbus دىن WordPress كە كۆچكىلى بولىدىكەن. ھەم WordPress دىن Blogger.com غا بىۋاستە كۆچكىلى بولىدۇ. شۇڭلاشقا سىز ئەگەر Blogbus دىن Blogspot.com غا يۆتكەلمەكچى بولسىڭىز، ئاۋال Blogbus دىكى يازمىلارنى wordpress كە كۆچۈرۋېلىپ، ئاندىن wordpress دىن Blogger غا كۆچۈڭ.
تەپسىلى رەسىملىك چۈشەندۈرۈشى ئىزدەنگۈچىلەرگە قالدى. رەھمەت.

Google بلوگ يۆتكەش قورالى 1.0 ئېلان قىلىندى

Blogbus ياخشىمۇ wordpress ياخشىمۇ؟ قايسى ياخشى بولسا شۇنىڭغا كۆچسىڭىز بولىدۇ. ئەلۋەتتە بۇ سىزنىڭ تاللىشىڭىز. قانداق كۆچۈش مەسلىسى باش قايدىغان مەسلە ئىدى. ئۆتكەن ھەپتە گۇگول شىركىتى بلوگ كۆچۈرۈش قورالىنى ئېلان قىلدى. بۇ قورال ئارقىلىق livejournal, wordpress,blogger قاتارلىق يەرشارىدىكى كۆپلىگەن داڭلىق بلوگلاردا يازغان بلوگىڭىزنى ئۆزىڭىز كۆچمەكچى بولغان بلوگ مۇلازىمەت سۇپىسىغا يۆتكەشكە بولىدۇ. بىر نەچچە كونۇپكا بىلەنلا ئاسان كۆچەلەيسىز.
دەسلەپ بلوگ يازغاندا uyghur.cn/blog نى ئىشلەتكەن. كېيىن بۇ مۇلازىمەت مۇقىم بولمىدى. ئۇنى Blogspot قا كۆچۈرگىلى بولماي نۇرغۇن يازمىلار يوقالدى. بىر مەزگىل Blogspot ئېچىلماس بولۇپ قالغاندا Blogbus ئىشلەتكەن ئىدىم. Blogspot دىكى يازمىلارنى زاپاسلاپ چىقارغىلى بولسىمۇ بۇ ھۆججەتنى Blogbus قوللىمىدى. شۇنىڭ بىلەن Blogspot بىلەن blogbus ئارىسىدا كۆچۈشنى ئەمەلگە ئاشۇرغىلى بولمىدى. مەن يەنە بىر مەزگىل z-blog نى ئىشلەتتىم. شەخسى بوشلۇق ئىشلىتىپ بلوگ ئېچىشنىڭ كۆپ ئاۋارچىلىق ئىكەنلىكىنى بايقاپ، ئۇنى Blogspot قا كۆچۈرەي دىسەم كۆچۈرىدىغان ئۇسۇل يوق. شۇنىڭ بىلەن ئاخىرى نۇرغۇن يازمىلار يەنە يوقالدى.
Google شىركىتىنىڭ بۇنداق ئېسىل بىر قورالنى ئېلان قىلىشى مېنىڭچە ماڭا ئوخشاش مىڭلىغان بلوگ يازغۇچىلارنىڭ ئالقىشىغا ئېرىشىدۇ.
دوستانە ئەسكەرتىش: بۇ قورال تېخى 1.0 نۇسخا، ئىشلەتكەنلەردىن ئاڭلىشىمچە wordpress ۋە livejournal ،گۇگول blogger ئارسىدا مۇۋەپپەقىيەتلىك ئىشلەپتۇ. مېنىڭچە بىز ئىشلىتىۋاتقان blogbus ، ئۇزبلوگلاردىمۇ ئىشلەيدۇ. چۈنكى ئۇزبلوگ wordpress ئىشلەتكەن. تېخى 1.0 نۇسخا بولغاچقا ھازىرچە سىزنىڭ بلوگىڭىزنى كۆچۈرۈشتە قىيىنچىلىق بولسا، گۇگولغا ئىنكاس يېزىڭ. تۆۋەندە ئەسلى ماقالە ئادرېسىمۇ بېرىلدى. ئەگەر ئىنكاس يازالمىسىڭىز تەكلىماكان بلوگقا ئىنكاس يېزىڭ. مەن ئۇلارنىڭ بلوگىغا ئۇلار چۈشەنگۈدەك تىلغا ئايلاندۇرۇپ يوللاپ قوياي. بۇ قورالنى مەن تېخى سىنىمىدىم. چۈنكى مېنىڭ كۆچۈش نىيتىم يوق ھازىرچە. سىناپ كۆرگەندىن كېيىن تېخىمۇ تەپسىلى ئىشلىتىش ئۇسۇلىنى يېزىپ قويۇشۇم مۇمكىن.
Google بلوگ يۆتكەش قورالى 1.0 چۈشۈرۈش ئادرېسى
Google ئوچۇق كود بلوگىدىكى ئەسلى ئۇقتۇرۇش